WAKULIMA RUVUMA WALALAMIKIA  KUKOSA TAARIFA MUHIMU ZA KILIMO

Joseph Mwambije
Songea


Wakulima mkoani Ruvuma wamelalamikia uhaba wa upatikanaji wa taarifa na habari sahihi na zenye manufaa za kilimo kwa wakazi wa maeneo ya vijijini kuwa umechangia wao kutofanya vizuri katika shughuli zao na kuendelea kuwa masikini.

Wakulima hao walitoa malalamiko hayo juzi   kwenye mafunzo ya kuwajengea wakulima uelewa wa sera, mikataba, dira pamoja na mikakati inayoandaliwa na serikali, ambayo yanatolewa na Mtandao wa Vikundi vya Wakulima Tanzania (MVIWATA) kwa ufadhili wa shirika la Ujerumani la Meserior.

Mafunzo hayo yanaendelea kutolewa kwenye vijiji mbalimbali kwa kuwashirikisha wakulima na viongozi wa serikali ngazi ya kijiji na kata ambapo Wakulima hao walisema kutokana  na tatizo hilo wamefanya jitihada binafsi za kutafuta ili kupata habari hizo, lakini hawakufanikiwa baada ya kukosa ushirikiano toka kwa wataalam na viongozi wa serikali.

“Tumekuwa tukienda ofisini kwa viongozi wetu kuwaomba machapisho mbalimbali kama katiba na sera lakini nao wamekuwa wamekuwa wakituambia kuwa hawana hata tunapowaambia wafuatilie watuletee hakuna tunachokipata, tumebaki kusikia habari kwa watu tu ambao mara nyingi huwa siyo sahihi,”  alisema Rashid Haule mkulima wa kata ya Subira Songea mjini.

Aliongeza kuwa “kwa mfano hivi sasa tunapigania tupate nakala za katiba lakini tunaambiwa hazipatikani ili hali tunaambiwa timu ya kukusanya maoni itakapokuja twende kutoa maoni yetu, jiulize tutatoa maoni gani wakati katiba ya zamani hatuijui?”

Aidha wakulima hao walilaumu serikali kwa kuwalazimisha wakulima vijijini kutekeleza mikakati ambayo hawaijui na hakuna jitihada zinazowekwa za kuhakikisha habari sahihi zinawafikia walengwa.

Hata hivyo wakulima hao walizishukuru asasi na mashirika yasiyo ya kiserikali kama MVIWATA, ambayo yamekuwa yakiwasambazia machapisho mbalimbali yenye lengo la kumuelimisha mwananchi wa kijijini.

Kwa upande wao viongozi wa serikali ngazi za mitaa, vijiji na kata wamekiri ofisi zao kutokuwa na machapisho yenye habari muhimu kwa wakulima na kusema wao pia wamekuwa wakisikia tu habari za kuwepo kwa machapisho kadhaa lakini nakala zake hazijawafikia .

“Kuna vijarida vimetoka lakini kama sisi wenyeviti wa mitaa hatuna na vingine ndio tumeviona hapa kupitia kwenu MVIWATA zaidi tunapewa vitabu vyenye kanuni za kuwaongoza raia na vijarida vidogo vidogo vya kuhimiza watu watumie neti,”. Alisema Bw. Paulo Mumba Mwenyekiti wa mtaa katika kata ya subira.

Naye Afisa ugani wa kata ya Mpandangindo Bw. Eleuterius Ngowi alikiri kuwa licha ya kuwa katika sekta ya kilimo lakini hana habari sahihi kuhusiana na Mpango wa Maendeleo ya Kilimo wa Wilaya (DADPS) kwa kuwa hajawezeshwa vya kutosha.

Akizungumza kwenye mafunzo hayo, mratibu wa MVIWATA wa Mkoa wa Ruvuma   Ladslaus Bigambo, alisema mafunzo hayo yanatolewa ikiwa ni sehemu ya mkakati wa MVIWATA wa kuwajengea uwezo na hamasa ya kujisomea machapisho au vitabu mbalimbali vinavyomgusa moja kwa moja mkulima ili kuweza kukabiliana na changamoto mbalimbali zinazowazunguka kama njia mojawapo ya kutetea maslahi yao.

Alisema imebidi kuwahamasisha wakulima kuona umuhimu wa kujisomea kwani kuna vitu vingi vinavyowahusu ambavyo hawavijui na viongozi wanatumia udhaifu huo kutokuwatekelezea haki zao kwa kuwa wanafahamu hakuna mkulima atayewauliza wala kuwawajibisha.

“Dira ya Maendeleo ya Taifa inahamasisha mtu kujiwekea akiba na kuwekeza katika maeneo yenye tija kwa lengo la kujenga utajiri wa mtu binafsi, kwa kutumia dira hii viongozi wetu Serikalini wanafanya watakavyo masuala ya ufisadi na hakuna hatua yoyote wanayochukuliwa na Serikali kwa sababu hienda wanatimiza Dira ya Taifa ya Maendeleo” alisema Bw. Ladslausi.

Mafunzo haya yanatarajiwa kuendelea kutolewa katika kata kumi mkoani hapa zilizoko kwenye wilaya za Songea Mjini, Songea vijijini, Tunduru na Mbinga, na katika kila wilaya zimechaguliwa kata mbili zenye idadi ya wakulima 100 na  wakiwakilishi wa serikali .


Mwisho