VIONGOZI WA CHAMA CHA WAANDISHI WA HABARI MKOA WA RUVUMA WANOLEWA

Afisa  Mipango wa Muungano wa Vilabu vya Waandishi wa habari Nchini(UTPC) Bw. Jacob Kambili akizungumza

wakati akitoa mafunzo kwa Viongozi wa Klabu ya Waaandishi wa habari Mkoa wa Ruvuma(RPC) jana Mjini Songea kwenye Ofisi za Klabu hiyo.

VIONGOZI WA CHAMA CHA WAANDISHI WA HABARI MKOA WA RUVUMA WANOLEWA

Na Joseph Mwambije

Songea

VIONGOZI Chama cha Waandishi  wa habari  Mkoa wa Ruvuma(RPC) wamepatiwa mafunzo ya Uongozi  ili kuondokana na migogoro ya mara kwa mara inyozikumba Klabu nyingi za Vyama vya Waandishi wa habari Nchini na kudumaza maendeleo .

Klabu hiyo imeanza Vyema kwani mafunzo hayo yametolewa jana katika Ofisi za Chama hicho mjini Songea na Muungano wa Klabu za Waandishi wa habari Nchini(UTPC) ili kuwajengea uwezo Viongozi wa Klabu hiyo.

Mkufunzi katika mafunzo hayo alikuwa Afisa Mipango wa UTPC,Jacob Kambili ambaye aliwataka Viongozi wa Klabu hiyo kushikamana na kushirikisha wanachama katika mipango yao na kwamba ushirikishwaji utaondoa migogoro katika Klabu.

‘Tunawajengea uwezo Viongozi wa  Klabu kwa kuwa Klabu zikiwa imara na UTPC itakuwa imara kwa kuwa Taasisi hiyo ni mali ya Klabu za Waandishi wa habari Nchini’alisema Kambili.

Aliwataka Viongozi wa Klabu hiyo kuwa Waadilifu,Wenye maadili  na Mabalozi wema wa Chama chao,kutunza siri za Vikao na kuwa na misimamo thabiti na kukubali kukosolewa huku wakiwa wasikilizaji zaidi kuliko wazungumzaji.

Kwa upande wake Katibu  Mkuu wa Klabu hiyo,Andrew Chatwanga amesema Klabu hiyo imeanza vyema Mwaka huu kwa kuwa mafunzo yamefanyika  Januari mosi  hivyo mwaka huu utakua mwema kwa Klabu hiyo.

Naye Mwenyekiti wa Klabu hiyo,Andrew Kuchonjoma alisema kuwa Lengo la Klabu hiyo ni kuonyesha njia ndani  na nje ya Klabu hivyo mafunzo yao yatawasaidia kufikia malengo makubwa iliyojiwekea ikiwa Kuanzisha Redio na Televisheni Mkoani Ruvuma.

Mafunzo hayo yametolewa kwa Kamati yote ya Utendaji ya Klabu hiyo huku yakihudhuriwa na Mwenyekiti na Katibu Mkuu wa Klabu hiyo na yataendelea kutolewa na Klabu nyingine Nchi nzima.

Mwisho